kuwait

حسافة عليج يا كويت

دخلنا في سنة 2008 .. يعني صار لنا 18 سنة من الغزو .. يعني اللي انولد ذيج الأيام ، تخرج من الثنوية و يبي يدش الجامعة و يبي يتزوج .. يعني فيه جيل يديد طلع .. يعني السنين مرت .. يعني بدينا نكبر و نشيب .. خلال هذي الفترة ، جم شغلة تغيرت بالكويت ، نقولها للأمانة: · فتحنا سوق شرق و المارينا .. و توه هم بطلوا الأفنيوز. · الجمعيات صارت شوية كشخة. · المدينة الترفيهية صار فيها قطار ينقلب! و يمكن جم إشارة سووها دوار .. و حطوا نفق بالدائري الخامس ، صار له دهر و ما خلص .. للأسف ، راحت الأيام اللي الناس كانت تحسدنا لأنا كويتيين ، يوم كنا النموذج ، الناجح و الكل يشوفنا و يقلدنا ، و وده إصير مثلنا .. صرنا آخر عمرنا المساكين اللي نكسر الخاطر ، الناس كلها طايرة ، و احنا بالغصب نلحقهم على 'عربانة و حصان' .. شوفوا الخليج اشلون قام و صار مشاريع و استثمارات و تخطيط و رؤية و تنمية و ناطحات سحاب ، و احنا لما الحين مستانسين على برج التحرير ، لا و ما يخلونا نصعده بعد !! في دبي ، بنوا أربع جزر صناعية تنشاف من القمر ، و بالكويت مو عارفين شيسون في فيلجا ! في السعودية ، بنوا مدن طبية و مستشفيات تخصصية ، و بالكويت لما الحين قاعدين يصبغون مستشفى الصباح و يرقعون الرازي و يطفون الجهرا ! في قطر ، قاعدين يسون مدينة كاملة للطاقة ، و بالكويت ، و بعز الحر ، كل يوم يدقون علينا ، يبونا نسكر المكيفات عشان ما تنطفي علينا الكهربا ! حتى المنتخب فشلنا و رفع ضغطنا .. مسرحياتنا صارت مليقة ، مسلسلاتنا صارت سخيفة ,, و الكويتية إن طارت بالموعد صفقوا للكابتن ! جسر الصبية خو من انولدت و أنا أسمع فيه ، القدس راح تتحرر و احنا ليلحين نسوي دراسة بيئية حقه ! الأسعار شبت نار ، و المعاشات ما توكل خبز ، و العيشة كلها أقساط .. بيوتنا أقساط .. سياييرنا أقساط .. حتى حريمنا قمنا ناخذهم بالأقساط ! و عسى ما صارت عطلة أو إجازة ، إن شاء الله 3 أيام ، شفت الناس كلها هجت و سافرت و الديرة خلت .. و الله ما ينلامون الأوادم ، و ين نبيهم يروحون الجزيرة الخضرا ؟؟ و لا النافورة الراقصة ؟؟ حرام و الله الكويت تصير جذي ، بس تدرون .. المشكلة مو فيها ، المشكلة فينا ! بقلم دكتور كويتي